喺外國生活過一段時間嘅我，喺完全唔會去judge砲友這件事。
買衫之前可以先試個size，結婚之前可以先試同居，拍拖之前點解唔可以先試一砲？大佬，唔試過點知其實用唔用到㗎？! 我並唔覺得女性”拋個身出黎”叫做唔愛惜自己。首先，女人天性喺憑感覺做決定，有feel有spark先會比男人稍作接近，無人叫你求其揀見一個上一個；第二，當你take control嘅時候全程目的係滿足自己focus自己，如果你利用身體去滿足對方先叫做糟蹋身體，砲友同砲灰都傻傻分不清楚😃
我認為對於女性，發生一夜情同friends with benefit 喺兩個完全相反嘅出發點。(男人就當然一樣:出發點都在下體 🤗) 玩砲嘅都係比較清楚自己要啲乜，自我保護意識非常之高而且有小小自私 -> 大概怕再受傷害。多數雙方互相都有小小feel，未想一齊住又唔想嘥時間嘅成年人就好順理成章步入砲段。
然後你會問，既然大家都有”細微的小火花”，點解唔喺埋一齊呢？
或者，我哋仍然未玩夠
或者，我哋心裡面仲等緊一個人
或者，我哋剛失戀需要安慰
或者，我哋正在試探究竟你適唔適合我
或者，我哋明知無將來所有想無悔一下
當你心理同生理寂寞嘅時候，有人給你溫暖給你歡愉，唔似戀愛那般沈重，卻比一夜情維持更耐...所以其實對某啲人黎講，發展為”砲友”嘅關係似乎係非常理想。我唔係鼓吹friends with benefit，但係我覺得現今嘅社會其實明明有人在做，卻掩耳盜鈴唔敢講，又或者貶低成件事自己扮聖人唔肯認，咁不如好好訂個遊戲規範，彼此似乎會愉快啲。
#1 趁早表明自己底線同原則
千祈唔好怕同”隊友”講清楚自己嘅想法，而且你必須堅持你嘅原則(例如出街一定唔拖手)，並且喺必要嘅時候決絕say no。唔好讓對方用言語控制你用情緒勒索你，或者利用你嘅内疚感令你去做你唔想做嘅事（始終女仔比較情緒化)。砲友關係目的係輕鬆保持自由身 - 如果你感到被束縛，就係時候結束關係。
#2 生活上要分清楚角色
既然大家唔係official，就麻煩私生活一律唔好過問，亦唔需要見家長唔好交換朋友圈，大時大節唔好expect一齊過，避免送禮物及任何大動作，大家保持尊重唔干涉。那怕一點點嘅愛意，都會令自己通向更加複雜嘅關係鋪路，所以僅記儘量唔好踩過界: 見面時係男女朋友，唔見面係半個陌生人。
#3 床上亦要分清楚角色
由於男女大不同，作為女性用家更加要撑握自己嘅控制權自己take control。我建議儘可能唔好過夜唔好留低私人物品 (所以男生們敬請預約，姐們好忙唔係booty call)，亦唔好做太多不必要嘅完事後溫存例如抱抱。你估做愛，真係會做出愛來咩? 女人係但係男人肯定唔係囉。
#4 保持約會其他人
“砲友扶正”呢個想法係絕對唔可以妄想！所以不妨繼續以單身嘅身份去社交Keep your options open，真緣份永遠要自己主動搵，而且同時可以分散放喺自己”隊友”身上嘅attention，唔好令自己喺一段砲友關係中只習慣一張臉(有啲人甚至可以習慣多個身體)，亦確保你嘅”另一半”明白呢點。
#5 千祈唔好暈晒大浪
唔係base on感情開始嘅情感，雙方處於一種”很親近但又很疏遠”嘅位置，尤其想尋找慰藉心靈嘅人(砲場只慰藉肉體啊 ✊🏼)，往往容易伴隨過多嘅情緒風險，而妒忌係其中一個嚴重警號。如果佢暈你唔暈，你就可能要好好拒絕佢，若佢無法承受，那就係時候換個砲友；但係如果你暈佢唔暈嘅話，你感到痛苦就請你立刻棄game吧。
其實講到呢到你心知我肚明，呢種微妙關係原本無傷大雅各取所需，但只要當其中一方心靈上有情感轉變，突然砲友想扶正就會令對方之間充滿尷尬與壓力。始終女人對於性同愛係比較難分開，所以鹽姐對各位忠告: 你玩唔起，就只會俾人玩! 感情唔係功課事業努力就能達成，你可以執意讓故事延長，但係本來兩人只求肉體嘅慾望你卻突然想要愛情，最後只會成為你一人付出身體嘅痛苦。
總之，凡事諗清楚，唔好令自己後悔就好。
共勉之。
#你估友誼波真係增進友誼咩
#女人像鹽
Search